Ministria e Arsimit, Shkencës, Teknologjisë dhe Inovacionit njoftoi se viti shkollor do të ndahet në dy periudha kohore (gjysëmvjetori i parë dhe gjysëmvjetori i dytë), por ekspertët e shohin mjaftë problematike mungesën e një strategjie koherente, shkruan arbresh.info.

Sipas, MAShT’it kjo do të bëhet për vlerësim sa më objektiv, të drejtë, transparent, valid e më praktik, të nxënësve.

Por, psikologu Labinot Kunushevci për arbresh.info tha se kjo tregon që Ministria e Arsimit ka dështu në krijimin e një strategjie koherente mbi arsimin pas sistemit kurrikular, sepse ajo ka eksperimentu me kurrikulën.

“Kthimi ne versionin e dy gjysmë-vjetorëve mund të ketë anët pozitive dhe negative, duke filluar nga ideja që me një projeksion të tillë të shkarkohet ngarkesa e tepruar administrative, gjë që është shumë e qëlluar, por duke mos e pasur në konsideratë faktin tjetër në mënyrën e vlerësimit të nxënësi”, tha Kunushevci.

Sipas tij në verzionin me dy gjysmë vjetora, nëse notat barazpeshohen, një nxënës që notohet në gjysmë vjetorin e parë mjaftueshëm me 2, ai mund të mos angazhohet fare në gjysmë vjetorin e dytë sepse e ka të siguruar notën kaluese.

“Pra, kjo qasje e stimulon indiferencën tek ata nxënës të dobët”, shtoi ai.

Zojë Krasnqi profesoreshë në shkollën e mesme “Hivzi Sylejmani”, në Fushë Kosovë, mendon se ky ndryshim do të ketë efekt pozitiv.

“Ndarja në tri periudha ka qenë sfiduese edhe për ne si staf i mësimdhënësve gjithashtu edhe për nxënësit”, tha Krasniqi.

Ministrja e Arsimit, Shkencës, Teknologjisë dhe Inovacionit, Arbërie Nagavci përmes një postimi në facebook kishte reaguar për këtë gjë.

Kjo gjë sipas saj ka ardhur me kërkesë të mësimdhënësve, nxënësve e prindërve.

“Ndryshimi i këtij dokumenti të rëndësishëm, është inicuar me kërkesë të mësimdhënësve, nxënësve e prindërve, pasi që është vlerësuar se ndarja e vitit shkollor në tri periudha, siç ka qenë deri më tani, paraqet sfida dhe vështirësi të shumta, ngarkesë të panevojshme formale e administrative dhe rrezikon përmbajtjen e materies vlerësuese”, ka shkruar Nagavci.

Udhëzimi i ri administrativ reflekton në përmbajtje cilësore të vlerësimit të nxënësve, shkarkimin e ngarkesës administrative për mësimdhënësit, informimin me kohë të nxënësve dhe prindërve për suksesin dhe rezultatin e nxënësve në lëndët e caktuara.

Ky Udhëzim Administrativ për vlerësimin e nxënësve sipas Kornizës së Kurrikulës është në diskutim publik deri më 23 qershor 2022./Kujtesa Berisha/arbresh.info/